ایک غزل - جون ایلیا

اپنی منزل کا راستہ بھیجو

جان ہم کو وہاں بلا بھیجو

کیا ہمارا نہیں رہا ساون

زلف یاں بھی کوئی گھٹا بھیجو

نئی کلیاں جو اب کھلی ہیں وہاں

ان کی خوشبو کو اک ذرا بھیجو

ہم نہ جیتے ہیں اور نہ مرتے ہیں

درد بھیجو نہ تم دوا بھیجو

دھول اڑتی ہے جو اس آنگن میں

اس کو بھیجو ، صبا صبا بھیجو

اے فقیرو! گلی کے اس گل کی

تم ہمیں اپنی خاکِ پا بھیجو

شفقِ شام ہجر کے ہاتھوں

اپنی اتری ہوئی قبا بھیجو

کچھ تو رشتہ ہے تم سے کم بختو

کچھ نہیں، کوئی بد دعا بھیجو

(جون ایلیا​)

Apni Manzil Ka Raasta Bhejo

Jaan Hum Ko Wahaan Bula Bhejo

Kya Hamaara Nahin Raha Saawan

Zulf Yaan Bhi Koi Ghataa Bhejo

Nayi Kaliyaan Jo Ab Khili Hain Wahaan

Un Ki Khushboo Ko Ik Zaraa Bhejo

Hum Na Jeete Hain Aur Na Marte Hain

Dard Bhejo Na Tum Dawaa Bhejo

Dhoool Udti Hai Jo Us Aangan Mein

Us Ko Bhejo, Saba Saba Bhejo

Ai Faqeero! Galli Ke Us Gull Ki

Tum Humein Apni Khaak-E-Paa Bhejo

Shafaq-E-Shaam-E-Hijr Ke Haathon

Apni Utri Hui Qabaa Bhejo

Kuchh To Rishta Hai Tum Se Kambakhto

Kuchh Nahin, Koi Bad-Dua Bhejo!!

(Jaun Elia)